عاجل جدا ....

أنا حبيبتي بدها تهجرني .. والسبب انو انو بدها تسافر من هون .. عم تقلي انو ملت من هالبلد .. شو بسوي ..؟؟ بهاجر معاها ..؟؟ والا بتركها وبنساها ؟؟

يا أخي الكريم حبيبتك ليش بدها تتركك بس لأنها بدها تسافر؟
إذا بس لهيك معناها ما بتحبك ويلي بيتركك أتركه!
وأنا برأي يا سهران لحالك خليك سهران لحالك أحسن ألك وفكر بلأيام الجايي ؟

أنا ظروفي ما بتسمح بالسفر حاليا، لازم كمل هالسنة والا بيفصلوني من عملي نهائي، طيب ليش هيي ما بتتضحي كمان شوي .؟؟ انا اللي عم سويه من اجلها، ومن اجل حياة افضل، تتحملني هالكم شهر .. وبعدين بروح معاها وين ما بدها .
شكرا لكل من ساهم ويا ريت تعطوني رأيكم .

يا أخي سهران لحالك يعني انت عمرك 30 سنه إن شاء الله العمر كله وانا شايف أنه انت لازم يكون عندك حل لهالمشكلة لأنو أنا أصغر منك بسنة والباقي تقريبا متلي يعني أنت أكبر منا كلنا
صحي بجوز يكون عنا نظرة غير نظرتك او رأي ما يكون بالحسبان بس انت لازم يكون عندك نظرة تبخش الحيط
انا برأيي متل ما قلتلك ورح ضل عند جوابي الأول لأنك رح توصل لها النتيجة بلآخر
انت ما فيك تضحي وهي ما فيها تضحي طيب بضحي انا عنكم؟
الحب ليس رواية شرقية بختامها يتزوج الأبطال
أنه الأبحار دون سفينة وشعورنا أن الوصول محال
لهيك خلص أكيد قضيت أيام ممتعة انت وياها واذا هي بدها تسافر وتتركك انت كمان أتركها وبالمحصلة بتكونوا عشتوا أيام لا تنسى؟

شبح الليل جوابك بيكون مقنع جدا في حال كان السؤال مقنع يعني هوي قال حبيبتو وقال رح يفصلو من شغلو وهي رح تسافر وتتركو طيب ممكن نركبها كيف هيك ممكن المراة بمجتمعنا راح تسافر وتترك حبيبها الا بحال كانت هي مجبره على هالشي كونها عايشه ببيت اهلها

حابب وضحلكم الوضع اكتر، وشكرا لكل من شاركني الرأي
الحقيقة أنا مهندس وموظف بشركة محترمة، والراتب عالي .. بس ندبتني الشركة من حوالي كم سنة الى دير الزور، و بحكم كون عملي واختصاصي ضمن الحقول النفطية ساكن بمجمع تابع للشركة بعيد عن دير الزور حوالي 75 كم، وزوجتي ملت من الوضع، كنا على اساس نبقى هون حوالي السنة بس، وعلى هالاساس اتحملت هيي، و هلق صار النا حوالي ال 3 سنين، والشركة واعدتني انو السنة الجاي رح ترجعني على اللاذقية، او مكان تاني اكتر حضارة متل حمص، او حتى ممكن روح سنة سوي خبرة بكندا، بس هيي مصرة على الرجعة على ضيعتنا جنب اللاذقية وبس، ولا اي مكان تاني.؟؟
الغريب بالوضع انو هيي بعد زيارتها الاخيرة للبلد رجعت تعبانة نفسيا، مع انو اهلها شجعوها على انو تتحمل هالسنة الباقية، و الحمدلله اشترينا بيت بنص اللاذقية ومعاي سيارة من الشركة، وكلوا بفضل البعثة الداخلية لهون، حتى عندي انترنيت ادسل، ومو منقص عليها شي، وبيني وبينكم، خايف انو يكون في شي ..؟؟ يعني ليش لتتغير فجأة معاي ؟؟ وتكون مصرة على الرجعة لمحل واحد ؟؟
ليش مانها عم تتحمل هالمرة وهيي اللي اتحملت من تلات سنين ؟؟؟؟
شكرا الكم

أخي العزيز هيك وضحة الفكرة أكتر وصارت بتنحل برأيي
1-المرأة يجب أن تكون مع الرجل في السراء وفي الضراء
يعني مو معقولة بس تكون الحياة حلوة بتعيش وبس تكون الحياة قاسية بتترك يعني الرجل بيكون عم يصارع الحياة وعم يصارع الزمن لحتى ينبسط هو وعائلته ويعيشوا أحلا عيشة مو معقولة تكون المرأة مع الزمن على الرجل وتتركه وحيد بوجه الزمن
2- إذا كان عندكم أولاد فالله يخليلك ياهم ويخلي ولاد الجميع يا رب
انت قلها تصبر ميشان الأولاد لأنه المرأة بس يكون في أولاد بتكون حياتها غير لما ما بيكون في أولاد وإذا ما في فالأحسن انك تسارع لأنجاب الأولاد وهيك بتتلهى بتربايتهم؟والله يرزقك صبي بجاه النبي
وانا برأيي المرأة تتبع زوجها مو الزوج يتبع الزوجة ؟
3-انا بتوقع انه ما رح يكون في شي إلا حبها للضيعة وحبها لأهلها بس البعد هو يلي عامل هالمشاكل
4-بحب اشكر أخت القمر وما تعصب علي لأنه كانت المشكلة ناقصة الأركان؟؟ولهيك كان جوابي ناقص الحلول
بتمنالك يا أخي سهران لحالي ان الله يرجع المي لمجاريها وتصير سهران انت وزوجتك الله يخليلك ياها يا رب ويخلي كل حبيب لحبيبته وبالعكس؟